Lajme

Enigmatike: Pse Ragmi Mustafa nuk u prit nga kryeministri Shqiptarë Edi Rama!?

Ka ndërmarrë një tur të çuditshëm Ragmi Mustafa, kryetari i Partisë Demokratike të Shqiptarëve në Preshevë, njëkohësisht ish-kryetar i komunës për tre mandate.

Zoti Mustafa, ditën e homazheve zyrtare për të ndjerin Jonuz Musliu, një nga liderët e shqiptarëve të Luginës dhe kryetar i Këshillit Shqiptar, ka marrë udhën në Tiranë, ku ka takuar vetëm Ilir Metën, PD-në dhe LSI-në e në valët e Top Channel ka sulmuar partinë fituese të zgjedhjeve vendore në Preshevë. (Kryeministri Edi Rama mësohet se nuk e ka pritur Mustafën).

Ajo parti është Alternativa për Ndryshim e Shqipërim Arifit.

Një parti e re, por jo krejt “fringo”, pasi zoti Arifi para dy vjetësh ishte kryetar në Preshevë në koalicion me Partinë për Veprim Demokratik të Riza Halimit.

Ragmi Mustafa e sulmoi fort Arifin duke e cilësuar “një mekanizëm të Beogradit dhe parti enigmatike që nuk dihet si është rritur”.

Deklarata e Ragmi Mustafës në Tiranë, përveçse jo korrekte është totalisht përçarëse. Kjo pasi Alternativa për Ndryshim, ashtu si ajo e zotit Mustafa ka garuar normalisht dhe ka dalë partia e parë me mbi 5 mijë vota.

E dyta ka dalë partia e Mustafës dhe e treta një parti e re e dalë pikërisht nga PDSH-ja. Dhe ky është proces i njohur jo vetëm ndër shqiptarë por kudo që ka parti të vjetra dhe të drejtuara nga një person prej vitesh.

Ragmi Mustafa ka 20 vjet në politikë, ndërsa Shqipërim Arifi, siç e tha ai vetë sapo ka ardhur dhe vetëm nga kjo është fenomen tërheqës për elektoratin.

Mustafën e kanë votuar për disa mandate shqiptarët e Luginës dhe më në fund e dërguan në opozitë. Ky është fenomeni më normal dhe përbën ABC-në e demokracisë. Pra nuk është dramë pse partia e Ragmi Mustafës ka shkuar në opozitë.

Nëse ai ka ndonjë informacion mbi bashkëpunimin e kryekomunarit Arifi me Beogradit, siç dhe thotë, atë duhet ta vërtetojë, ta artikulojë, dhe mirë do ishte që ta adresonte në institucionet e shtetit shqiptar dhe jo në parti politike të veçanta. Çështja e shqiptarëve jashtë kufijve është e drejtë institucionale e qeverisë.

Ndaj nuk do të ishte keq që t’ja thoshte Edi Ramës vërejtjet e tij, pasi në 2014-n ishte Mustafa që e priti kryeministrin shqiptar në Preshevë, ndërsa sot është Shqipërim Arifi që ka marrëdhënie me Edi Ramën.

Kjo është normale. Por përpara se të artikulonte në Tiranë akuza, do të duhet të mblidhte partitë shqiptare në Preshevë dhe prej andej të dilnin me një qëndrim sa më të pjekur dhe të bashkuar.

Ragmi Mustafa është një politikan veteran dhe i vjetër. Ai ka pasur marrëdhënie të afërta me autoritetet e Beogradit dhe kjo është normale.

Madje Vuçiç në 2015-n kur vizitoi Preshevën, tha pak si me të tallur se Rama e Thaçi kanë dhënë shumë pak për maternitetin e Preshevës, dhe Mustafa jo vetëm që nuk u kundërpërgjigj por qeshi me batutën pa kripë të Aleksandrit.

Askush nuk e akuzoi atë për lidhje të afërta. Të gjithë liderët që votohen janë përfaqësues, ndaj askush nuk mund t’i deligjitimojë.

Por problem me Shqipërim Arifin është se ai është një shqiptar tipik, jo vetëm nga emri por edhe nga sjellja, pamja, etika dhe përkushtimi ndaj familjes.

Siç e thonë edhe mediat serbe, “Arifi nuk di fare serbisht por flet vetëm gjermanishten dhe shqipen; të parën pasi ka jetuar si mërgimtar dhe të dytën se e ka gjuhë e nënës”.

Dhe këto duket po i japin Alternativës për Ndryshim atë cilësi që e kanë kthyer trendy sidomos tek brezat e rinj. Këta të fundit thjesht ndihen të lodhur me elitën e vjetër, ndodhta dhe më Ragminë vetë.

Related Articles

Back to top button