Ragmi Mustafa takon Pandeli Majkon dhe Sali Berishën

Kryetari i Partisë Demokratike Shqiptare z. Ragmi Mustafa gjatë ditës së sotme qëndroi në Republikën e Shqipërisë ku zhvilloi takime me ministrin e shtetit për diasporë z. Pandeli Majko si dhe ish kryeministrin shqiptarë, deputetin Sali Berisha, të cilët kanë shprehur interesim që të njihen nga afër për ngjarjet e fundit në Luginë të Preshevës.

Kryetari Mustafa, nga afër i njoftoi për zhvillimet dhe ngjarjet e fundit në Luginë të Preshevës, me theks të veçantë për organizimin e Kuvendit të Këshilltarëve shqiptar të Luginës së Preshevës.

Ministri i shtetit për diasporë në qeverinë e Republikës së Shqipërisë z. Pandeli Majko i dha mbështetje e fuqishme aprovimit të Deklaratës politike nga ana e përfaqësuesve legjitim të shqiptarëve në Komunat Preshevë, Bujanoc dhe Medvegjë.

Poashtu edhe në takimin me ish kryeministrin shqiptarë dhe deputetin aktual të Partisë Demokratike z. Sali Berisha u sigurua mbështetje e plotë lidhur me kërkesat e shqiptarëve të Luginës së Preshevës të shprehura përmes Deklaratës politike të aprovuar në seancën e Kuvendit të Këshilltarëve shqiptar të Luginës së Preshevës më, 14 korrik 2018.

Në të dy takimet u konstatua se zgjidhja e statusit politik të shqiptarëve të Luginës së Preshevës ndikon në normalizimin e mirëfilltë të raporteve në mes shqiptarëve dhe serbëve në përgjithësi si dhe Beogradit dhe Prishtinës në veçanti.

20 korrik 2018
Shërbimi për informim i PDSH-së