Lugina përplas keq Sali Berishën me Hashim Thaçin: akuza për strehim të Bin Ladenit e punë të pista me Millosheviçin

Nga Blendi Gashi

Përplasjet e Hashim Thaçit me drejtuesit e partive politike në Kosovë janë një gjë e rëndomtë dhe kjo nuk është gjë e çuditshme duke pasur parasysh se nga paslufta mbetet njeriu më i pushtetshëm.

Por pakkush mund të mendonte se Thaçi do përplasej njëjtë edhe me politikanë të Shqipërisë, apo thënë më saktë ndër njerëzit poashtu më të pushtetshëm atje, Sali Berishën.

Shkak për këtë është bërë situata e fundit politike në Kosovë, gjegjësisht ideja e shpalosur nga Thaçi për ndryshim të kufijve dhe shkëmbimit të territoreve me Serbinë, çka fuqishëm ka dalë kundër Berisha.

Ky i fundit ka dhënë një deklaratë të fortë duke thënë se Lugina e Preshevës nuk duhet të përdoret për tregti ndërmjet dy shteteve e aq më pak të preken kufijtë e Kosovës që janë njohur ndërkombëtarisht nga 115 shtete.

“Personalisht unë kam qenë dhe jam gjithnjë për paprekshmërinë e kufijve të Kosovës dhe çdo lloj coptimi, ndarje apo tregtie me territorin e saj dhe kundër çdo diskutimi për këto çështje. Shqiptarët e komunave të Luginës kanë nevojë për garantimin e të drejtave të tyre në përputhje me konventën Evropiane të të Drejtave të Njeriut, investime dhe zhvillim dhe jo që të përdoren për interesa të Serbisë për tregti territoresh”, shkruan Berisha në Facebook, pas një takimi që ka pasur me udhëheqës të Luginës.

Kjo deklaratë e Berishës ka bërë jo pak nervoz Thaçin që i është kundërpërgjigjur ashpër edhe pse nuk ja ka përmendur emrin, duke thënë se Kosovës nuk i duhen këshillat e të dëbuarve me votë masive nga skena politike, ndërsa e ka akuzuar për punë të pista me Millosheviçin dhe strehim të terroristit Osama Bin Laden.

“Veçanërisht të atyre që në mes viteve 1992 – 1997 tregtonin dhe bënin që me punët e tyre të pista të mbijetonte makineria ushtarake dhe policore e kasapit të Ballkanit, Sllobodan Millosheviq. Ata duke mbushur xhepat e tyre, u kujdesën me devotshmëri që rezervuaret e tankeve dhe autoblindave të jenë të mbushur plot, përkundër faktit se bashkësia ndërkombëtare kishte vënë sanksione kundër Millosheviqit. Nuk i duhen këshillat e atyre që strehuan Bin Ladenin, vrasësin e civilizimit botëror si dhe Arkanin, vrasësin e shqiptarëve të Kosovës. Nuk i duhen këshillat e atyre që burgosën komandantin legjendar Adem Jashari, si dhe komandantë të shquar si Fehmi e Xhevë Lladrovci, Zahir Pajazit, dhe UÇK-në e etiketuan si terroriste. Këta që sot kundërshtojnë vullnetin e shqiptarëve të Preshevës, Bujanovcit e Medvegjës për bashkim me Kosovën, janë të njëjtit që Presidenti Rugova për së gjalli nuk i lejoi ta shkelin tokën e Kosovës. Këshillat e tyre i takojnë kohës së turpit të historisë shqiptare”, shkruan Thaçi në Facebook.

Mbetet të shihet nëse këtyre akuzave do ju kundërpërgjigjet Berisha apo jo. Nëse po, pritet që dy politikanët në fjalë të qesin në dritë të palara të tyre ndër vite.