Gjilan: Kujtuan se foshnja vdiq, familjarët rrahin gjinekologun shqiptar

Një ngjarje e rëndë ka ndodhur në Spitalin rajonal të Gjilanit në Kosovë, ku një mjek është dhunuar, ndërsa ishte në sallën e lindjes dhe po ndihmonte një paciente për të sjellë në jetë një foshnje. Familjarë të gruas që po e kryente lindjen kanë sulmuar gjinekologun Vaxhid Thaçi.

Gjithçka ndodhi pas një informate të rreme që ishin marrë familjarët e gruas që qëndronin jashtë sallës së lindjes.

Ata menduan se foshnja vdiq ndaj hynë në sallë të revoltuar në kohën kur po kryhej lindja. Ata sulmuan mjekun si dhe thyen disa dritare të sallës së lindjes.

Lajmi që familjarët e kishin marrë për vdekjen e foshnjës, nuk kishte qenë i saktë. Gjendja shëndetësore e nënës dhe e foshnjës është e qëndrueshme dhe se e gjithë ngjarja kishte ndodhur pas një keqkuptimi. Ngjarja po hetohet nga policia e Kosovës.