Pas rasteve të shumta, ja çfarë apelohet në Maqedoni

Dje në Maqedoni u regjistruan 1.192 raste të reja me COVID-19, që është rekord ditore që nga fillimi i pandemisë. Gjithashtu humbën jetën 22 persona.

Vala e vjeshtës e coroanvirusit i ka mbushur edhe kapacitetet spitalore. Janë hospitalizuar 844 pacientë, prej të cilëve 130 janë me mbështetje të oksigjenit, ndërsa dy në respirator, përcjell Telegrafi Maqedoni.

Nga Ministria e Shëndetësisë apelojnë që të respektohen masat, në mënyrë që të parandalohet kolapsi i sistemit shëndetësor.

Ata thonë se i kanë rritur kapacitetet për testim për COVID-19, ndërsa të gjitha klinikat interne në vend do të pranojnë pacientë me coronavirus.

Ndryshe, Qeveria ka vendosur masa të reja për parandalimin e kësaj sëmundje – objektet hotelerike do të punojnë deri në ora 21:00, si dhe ndalohet grupimi i më shumë se katër personave pas orës 21:00.

Funksionarët qeveritar thonë se për momentin nuk mendohet që të ketë karantinim të plotë, por që nuk e përjashtojnë këtë mundësi.

Theksojmë që numri i përgjithshëm i të infektuarve me COVID-19 në Maqedoni është 35.097, prej të cilëve 22.024 janë shëruar, ndërsa 1071 kanë ndërruar jetë. Numri i rasteve aktive është 12.002.