Nga nesër në Gjermani çmimet e ushqimeve do të rriten me 20-50%

Vetëm disa ditë pasi Gjermania raportoi inflacionin më të lartë ndër vite, me një ritëm vjetor prej 7.6%, raportohet se të hënën do të ketë të tjera lajme jo të mira për gjermanët.

Sipas Shoqatës Gjermane të Shitjeve me Pakicë (HDE), konsumatorët duhet të përgatiten për një valë tjetër të rritjes së çmimeve për mallrat e përditshme ushqimore. Reuters raporton se çmimet në zinxhirët gjermanë të shitjes me pakicë do të kapërcejnë midis 20 dhe 50%.

*Zinxhirët e shitjes me pakicë në Gjermani do të rrisin çmimet e ushqimeve me 20-50% të hënën.*

Edhe para shpërthimit të luftës në Ukrainë, çmimet ishin rritur me rreth 5% “në të gjithë gamën e produkteve” si rezultat i rritjes së çmimeve të energjisë, tha presidenti i HDE Josef Sanktjohanser për Neue Osnabrücker Zeitung të premten.

*”Së shpejti do të jemi në gjendje të shohim ndikimin e luftës të reflektuar në etiketat e çmimeve në të gjitha supermarketet,”* tha Sanktjohanser.

Së fundmi, rrjetet e njohura të shitjes me pakicë si Aldi, Edeka dhe Globus njoftuan se do të detyrohen të rrisin çmimet e tyre. Në dyqanet Aldi, mishi dhe gjalpi do të jenë “dukshëm më të shtrenjta” nga e hëna për shkak të rritjes së çmimeve nga furnitorët e tij.

Në shkurt, kostoja e jetesës së Gjermanisë u rrit në nivelin më të lartë që nga ribashkimi, me mallrat e përditshme që u rritën mesatarisht me 7.3%. Agjencia federale e statistikave Destatis tha se kërcimi nga shifra e janarit prej 5.1% në 7.3% të shkurtit pasqyroi ndikimin e pushtimit rus të Ukrainës, i cili ka rritur çmimin e naftës dhe gazit.