U vendos: Serbët në Kosovë braktisin të gjitha institucionet politike
Në Komunën e Zveçanit ka përfunduar takimi i përfaqësuesve politikë serbë nga veriu i Kosovës me përfaqësues të të gjitha institucioneve në veri.
Në takim morën pjesë liderët e Listës Serbe dhe të katër komunave nga veriu – Severna Mitrovica, Zubin Potok, Zveçan dhe Leposaviq.
Kryetari i Listës Serbe, Goran Rakiq, ka thënë sot se në mbledhjen e përfaqësuesve politikë dhe institucionalë të serbëve është vendosur që serbët të largohen nga të gjitha institucionet politike – Kuvendi, Qeveria dhe 4 komunat, por edhe nga drejtësia, autoritetet, policia dhe administrata në Kosovë.
Siç tha ai në konferencën për media, ato vendime do të jenë në fuqi derisa Prishtina të fillojë të respektojë marrëveshjet dhe ligjin, derisa të tërheqë vendimin për targa dhe të formojë Asosiacionin e komunave Serbe.
Pas kësaj, Rakiq dha dorëheqje nga pozita e ministrit në Qeverinë e Prishtinës, ndërsa përfaqësues të tjerë të serbëve po ashtu dhanë dorëheqje nga pozita e deputetëve, kryetarëve të katër komunave në veri të Kosovës, si dhe të gjithë punonjësve të institucioneve në Kosovë.
Rakiq tha se në takim është konstatuar se Prishtina vazhdimisht po shkel të drejtën ndërkombëtare dhe marrëveshjet e arritura në Bruksel, si dhe se populli serb në Kosovë është i ekspozuar ndaj terrorit të vazhdueshëm dhe akteve të njëanshme të paligjshme.
“Duke filluar nga shkeljet e lirisë së lëvizjes, bastisjet nga ROSU, ndërtimi i bazave policore, ndjekjet për fjalime politike, ndalimi i të drejtës së votës dhe përpjekjet për të provokuar një fatkeqësi humanitare duke ndaluar vaksinimet, duke përdhosur varret”, tha Rakiq.
