Prezantohet doza e pestë e vaksinës kundër koronës: Në më pak se dy javë

Australia është ndër vendet me numrin më të madh të personave të vaksinuar kundër koronavirusit dhe tani ka vendosur të prezantojë dozën e pestë të vaksinës.

Australia do të prezantojë një dozë të pestë të vaksinave kundër koronavirusit më vonë këtë muaj për të gjithë qytetarët e moshës 18 vjeç e lart që nuk janë infektuar me koronavirus ose nuk janë vaksinuar në gjashtë muajt e fundit, tha Ministri i Shëndetësisë Mark Butler.

Vendimi shtrin të drejtën për vaksinim shtesë për rreth 14 milionë njerëz, më shumë se gjysma e popullsisë së vendit, të cilëve do t’u ofrohet vaksina specifike për variantin Omicron duke filluar nga 20 shkurti, tha Butler.

Deri më tani, vetëm personat me imunitet të dobët rekomandohej të merrnin dozën e pestë dhe këshilla ishte që të merrnin një vaksinë shtesë tre muaj pas dozës së katërt.

Australia, e cila është ndër vendet me numrin më të madh të personave të vaksinuar kundër koronavirusit, deri më tani ka administruar dy doza vaksinash për 95% të njerëzve mbi moshën 16 vjeç.

Kjo e ka ndihmuar Australinë të mbajë numrin e infeksioneve relativisht të ulët në krahasim me vendet e tjera të zhvilluara.

Megjithatë, përvetësimi i vaksinave shtesë ka qenë i ngadaltë, me shifrat zyrtare që tregojnë se rreth 72% kanë marrë dozën e tretë dhe vetëm 44% kanë marrë të katërtën.

Butler tha se njerëzit mbi moshën 65 vjeç ishin ende në rrezik të lartë të sëmundjes së rëndë dhe vdekjes nga koronavirusi dhe për këtë arsye u kërkoi atyre të merrnin vaksinën e pestë nëse kishin të drejtë.