Diaspora shqiptare kundër marrëveshjes Kurti – Vuçiq, protestë në SHBA

Marrëveshja mes Kosovës dhe Serbisë në një prej pikave të saj përmban edhe Asociacionin e komunave serbe.

Opinioni publik në Kosovë e më gjerë ka vënë me shpatulla pas murit kryeministrin Albin Kurtin teksa i bëjnë thirrje të mos e pranojë marrëveshjen.

Lidhur me këtë çështje ka reaguar edhe diaspora shqiptare në SHBA e cila ka vendosur të mbajë një protestë ditën e enjte duke i bërë thirrje Albin Kurtit të mos e nënshkruajë marrëveshjen.

Patrioti Mark Gjonaj, ish – Këshilltar në Bashkinë e New York-ut, ku përfaqëson Distriktin e Bronxit, është një prej organizatorëve të protestës.

Njoftimi i plotë i diasporës:

Të dashur miq,

Ju lutemi bashkohuni me ne që të mblidhemi për të mbështetur Kosovën gjatë negociatave të planit të propozuar nga Bashkimi Evropian për normalizim ndërmjet Kosovës dhe Serbisë.

BE-ja i ka bërë presion Kosovës që të pranojë krijimin e Asociacionit të Komunave Serbe që do të shkelte Kushtetutën e Kosovës dhe do të kërcënonte sovranitetin dhe stabilitetin e saj.

Kosova është një vend i lirë dhe i pavarur që duhet të ruajë autonominë e vet të vetëqeverisjes dhe sundimit. Nuk mund të lejojmë që Serbia të ndërhyjë dhe të qeverisë në Kosovë.

Qëndroni me popullin e Kosovës! (sillni flamujt dhe shenjat tuaja).

Ditën e enjte, 16 Mars 2023 në orën 13:00.