Ardita Sinani uron fitër bajramin

Të nderuar qytetarë të Luginës së Preshevës,

Të dashura motra e vëllezër musliman kudo që jeni,

Sonte me iftarin e fundit po e përfundojmë Ramazanin e këtij viti. Në këtë muaj të shenjtë me sakrificën tonë, duke u privuar nga ushqimi e pija, sfiduam psiqikisht e fizikisht veten.

Dëshmuam për një muaj rrjesht nga imsaku e në iftar forcën e mendjes mbi trupin.

Me të vetmin qëllim. Arritjen e kënaqësisë shpirtërore si dhe për të përmbushur urdhërin e Krijuesit.

Gjatë këtij muaji, stomakun e zbrazët e plogështinë e trupit për një periudhë të caktuar, e shoqëruam me shpirtin e mbushur nga mirësia e mirësjellja, veprat e mira e dashuria për njëri tjetrin.

E në Islam, pas çdo sakrifice vjen shpërblimi. Vjen gëzimi e festa.

Festa e Fitër Bajramit.

Njëra nga dy festat kryesore për muslimanët anekënd botës.

Të festojmë duke shumëfishuar lumturinë e duke e ndarë me të tjerët.

Le të urojmë më të mirën për njëri-tjetrin, për më të dashurit tanë, për kombin tonë.

Le të ndajmë sado pak nga sofrat tona të Bajramit për një shtresë që jeta i ka sfiduar me varfëri e skamje.

Uroj që reflektimet nga muaji që po e lëmë pas të na shërbejnë e të na kthehen në praktikë të përditshme përgjatë tërë vitit.

Qoftë festa e Fitër Bajramit gëzim për të gjithë shqiptarët kudo që jetojnë!

ME FAT!