Qentë endacak “pushtojnë” qendrën e Preshevës

Në qendër të qytetit të Preshevës, një grup qensh endacakë janë bërë pjesë e përditshmërisë së banorëve, duke pushtuar hapësirat publike dhe duke ngjallur shqetësim te qytetarët.

Foto e fundit e shkrepur nga Presheva.AL nga qendra e qytetit tregojnë qartë praninë e tyre të shtuar. Këto kafshë të pastreha, të mbledhura në grupe, lëvizin lirshëm mes makinave dhe këmbësorëve, duke krijuar situata të rrezikshme për fëmijët, të moshuarit dhe drejtuesit e automjeteve.

Komuna e Preshevës muaj më parë ka angazhuar një kompani për kapjen e qenëve endacak por si duket qentë e kapur janë liruar përsëri. Ndërkohë
banorët shprehen të shqetësuar për sigurinë e tyre, veçanërisht në orët e vona të mbrëmjes kur qentë endacakë bëhen më aktivë.

Presheva, si shumë qytete të tjera në rajon, po përballet prej kohësh me mungesën e një strategjie të mirëfilltë për menaxhimin e qenve endacakë.

Për momentin, situata mbetet sfiduese dhe kërkon vëmendje të menjëhershme nga autoritetet për të siguruar një bashkëjetesë më të sigurt mes banorëve dhe kafshëve të pastreha.