Banorët e Tërnavës kundërshtojnë ndërtimin e gurëthyesit në fshatin e tyre

Tërnavë, 19 shkurt 2025 – Banorët e fshatit Tërnavë në komunën e Preshevës kanë shprehur pakënaqësinë e tyre pas vendimit të Kuvendit Komunal për të miratuar ndërtimin e një gurëthyesi në malet mbi fshat. Sipas një reagimi të Bashkësisë Lokale të Tërnavës, ky vendim është marrë pa konsultim me banorët dhe përfaqësuesit lokalë.

Kryetari i Bashkësisë Lokale të Tërnavës, Afrim R. Abdullahu, ka deklaruar se pas miratimit të këtij vendimi ka marrë shumë telefonata nga qytetarë, përfshirë profesionistë të ndryshëm dhe përfaqësues të partive politike në Luginën e Preshevës, të cilët janë kundër ndërtimit të gurëthyesit.

Përveç banorëve të Tërnavës, edhe bashkësitë lokale të Norçës dhe Miratocit kanë shprehur kundërshtimin e tyre ndaj këtij vendimi. Në ditët në vijim, Bashkësia Lokale e Tërnavës planifikon të mbajë mbledhje dhe të organizojë një peticion për të kundërshtuar lejen për ndërtimin e gurëthyesit.

Ky zhvillim ka nxitur shqetësime të mëdha në komunitetin lokal, i cili druhet për ndikimet negative në mjedis dhe cilësinë e jetës në zonë. Banorët shpresojnë që zëri i tyre të dëgjohet dhe që autoritetet komunale të rishqyrtojnë vendimin e marrë.