Negociatat për formimin e qeverisë së re të Kosovës, Albin Kurti takohet me Fatmir Limajn

Gazetari Bahri Cani ka komentuar takimin e mbrëmshëm të kryeministrit, Albin Kurti me kreun e NISMA-s, Fatmir Limaj. Përmes një shkrimi në Facebook, ai është deklaruar rreth çështjes së koalicionit të ardhshëm.

“Personalisht mendoj se Kurti dhe Limaj kanë mundur dhe është dashur të takohen edhe në zyrë, zyrtarisht. Por është e drejtë e tyre të takohen e bisedojnë ku të duan”, ka shkruar ai. “Eh tashti, ka të tillë që thonë se Limaj pa AAK nuk do të futej në Kuvend, se nuk është e moralshme etj etj. Por në pyetje janë “interesat e vendit”!”, vijon Cani.

Postimi i plotë:

Kryeministri Albin Kurti dhe LVV synojnë që së bashku me konstituimin e Kuvendit të ri, me 15 prill të krijojnë dhe votojnë edhe qeverinë e re. Kurti ka pasur këto ditë në kabinetin e tij takime me përfaqësuesit e minoriteteve, përveç Listës Serbe.

Dy-tre prej tyre akoma nuk kanë deklaruar përfundimisht se do ta votojnë qeverinë Kurti III. Duda Balje për shembull ka kërkuar edhe një komunë boshnjake, e ajo ka kërkuar edhe post ministror apo postin e zvkryeministres.…

Mediat në Kosovë bëjnë të ditur që Kurti mbrëmë “ka darkuar” diku në Prishtinë me kryetarin e Nismës Socialdemokrate, Fatmir Limaj. Nisma ka 3 deputetë.

Thuhet se kanë biseduar për bashkëpunim. Nuk dihet se cilat janë rezultatet e darkës së përbashkët Kurti-Limaj, por dihet që LVV së bashku me Nismën dhe minoritetet joserbe do të kishte numër të mjaftueshëm për krijimin e qeverisë, më shumë se 60 vota.

Limaj ka qenë së bashku në zgjedhje me AAK-në, por ai ka thënë se “për interes të vendin” ai është i gatshëm për bashkëpunim edhe me Kurtin!

Personalisht mendoj se Kurti dhe Limaj kanë mundur dhe është dashur të takohen edhe në zyrë, zyrtarisht. Por është e drejtë e tyre të takohen e bisedojnë ku të duan.

Eh tashti, ka të tillë që thonë se Limaj pa AAK nuk do të futej në Kuvend, se nuk është e moralshme etj etj. Por në pyetje janë “interesat e vendit”!