Zëvendëskryeshefja e administratës komunale nën presionin e kryetares së komunës
Zëvendëskryeshefja e administratës komunale në Preshevë, e njohur për profesionalizmin dhe përkushtimin e saj në kryerjen e detyrave institucionale, po përballet me presione të vazhdueshme nga kryetarja e komunës Ardita Sinani, sipas një postimi të bërë nga Visar Memeti në rrjetet sociale.
Sipas Memetit, zëvendëskryeshefja, e njohur si “Aba Hidush”, më herët është detyruar të japë dorëheqje nga Komisioni për Prokurime për t’i liruar vendin bashkëshortes së një këshilltari të PVD-së. Ndërkohë, punonjësit e administratës komunale po përballen me kërcënime për të kryer detyra të cilat tejkalojnë përgjegjësitë e tyre zyrtare.
Memeti akuzon kryetaren e komunës për dështimin në përmbushjen e premtimeve për subvencione për bujqit, ndërsa tani, sipas tij, po i detyron zyrtarët të ndihmojnë bujqit për të mbuluar këto mungesa. Ky presion, sipas Memetit, po rrezikon karrierën e Aba Hidushit dhe po vë në pikëpyetje integritetin e administratës komunale.
