Rekord në mbylljen e kompanive në Gjermani gjatë vitit 2024
Në Gjermani gjatë vitit 2024 janë mbyllur gjithsej 196.100 kompani, që paraqet një rritje prej 16% krahasuar me vitin paraprak dhe është numri më i lartë i mbylljeve që nga kriza financiare globale e vitit 2011. Këto të dhëna janë publikuar nga agjencia Creditreform dhe instituti ekonomik ZEW, duke reflektuar sfida serioze për ekonominë gjermane.
Shkaqet kryesore të mbylljes së firmave:
Kosto të larta të energjisë: Sektori i prodhimit të energjisë është goditur më së shumti, me një rritje prej 26% të mbylljeve të kompanive, duke kaluar mbi një mijë ndërmarrje.
Mungesa e fuqisë punëtore të kualifikuar: Industria e IT-së, zhvillimi, teknologjia e gjelbër dhe diagnostika janë në rënie, pasi kompanitë nuk po arrijnë të plotësojnë kërkesat për shkak të mungesës së profesionistëve.
Konkurrenca e fortë ndërkombëtare: Bizneset vendore po përballen me presione gjithnjë e më të mëdha nga konkurrentët e huaj.
Sektorët më të prekur
Përveç sektorit të energjisë, mbyllje të mëdha janë shënuar edhe në industrinë farmaceutike dhe atë kimike. Po ashtu, ulje të ndjeshme ka pasur edhe në fushat që priten të jenë shtytës të rritjes ekonomike në të ardhmen: IT, teknologjia e gjelbër, zhvillimi dhe diagnostika.
Arsye të tjera të mbylljes
Jo të gjitha kompanitë janë mbyllur për shkak të falimentimit. Shumë janë mbyllur pasi pronarët janë afër pensionit dhe nuk kanë gjetur pasardhës. Disa të tjera, edhe pse fitimprurëse, janë mbyllur për shkak të mungesës së perspektivës afatgjatë.
