Java nis ftohtë, temperaturat në minus në Preshevë

Java e re ka nisur me mot të ftohtë në komunën e Preshevës, ku temperaturat kanë shënuar rënie të ndjeshme, duke kaluar në vlera minus, veçanërisht gjatë orëve të mëngjesit dhe natës.

Sipas parashikimeve meteorologjike, gjatë ditëve në vijim pritet mot kryesisht i kthjellët deri pjesërisht me vranësira, ndërsa temperaturat minimale do të zbresin nën zero, duke arritur deri në -5 gradë Celsius në disa zona të komunës. Temperaturat maksimale gjatë ditës do të jenë të ulëta, duke u luhatur nga 2 deri në 6 gradë Celsius.

Autoritetet lokale u bëjnë thirrje qytetarëve, sidomos të moshuarve dhe personave me sëmundje kronike, që të tregojnë kujdes të shtuar për shkak të të ftohtit, si dhe drejtuesve të automjeteve që të jenë të kujdesshëm në rrugë, për shkak të mundësisë së ngricave dhe rrëshqitjeve.

Mot i ftohtë pritet të vazhdojë edhe në ditët e ardhshme, ndërsa përmirësim i lehtë i temperaturave parashihet drejt fundit të javës.