Duhani, përgjegjës për 1 në 10 vdekje (Video)

Sëmundjet e lidhura me duhanpirjen janë përgjegjëse për 1 në 10 vdekje në botë, gjysma e të cilave në vetëm 4 vende, Kinë, Indi, SHBA dhe Rusi.

Në këtë përfundim ka arritur një studim i ri, i publikuar në revistën mjekësore “The Lancet”. Pavarësisht përpjekjeve dhjetëravjeçare për kontrollin e politikave të duhanpirjes, rritja e popullsisë është shoqëruar edhe me rritjen e numrit të duhanpirësve.

Sipas studiuesve, vdekshmëria mund të rritet edhe më shumë, ndërsa kompanitë e prodhimit të cigareve po shënjestrojnë në mënyrë agresive tregje të reja, veçanërisht tek vendet në zhvillim.

“Pavarësisht provave të pakundërshtueshme mbi efektet e dëmshme të duhanit në shëndet, 1 në 4 persona në botë është duhanpirës i rregullt”, komentoi autorja kryesore e studimit, Emanuela Gakidou. Raporti i titulluar “Barra globale e sëmundjeve” u bazua në zakonet e duhanpirjes në 195 vende dhe territore mes vitit 1990 dhe 2015. Ai zbuloi se gati 1 miliard njerëz konsumonin duhan në bazë ditore në vitin 2015, 1 në 4 burra dhe 1 në 20 gra.

Nëse krahasohet me vitin 1990, kur raporti ishte 1 në 3 burra dhe 1 në 12 gra, vihet re një reduktim, por gjithsesi shtimi i popullsisë nënkupton se ka patur një rritje të numrit total të duhanpirësve, nga 870 milionë që ishin në vitin 1990.

Gjithashtu, numri i të vdekurve nga duhanpirja ka pësuar një rritje prej 4.7%, me një total prej 6.4 milionë viktimash në vitin 2015.