Keni një punë zyre? Çfarë ndodh me trupin nëse qëndroni ulur për 8 deri në 10 orë në ditë

Nga të gjitha zakonet e përditshme, njeri në veçanti po shkatërron shëndetin tuaj.

Është ai, që në dukje është i padëmshëm, por që po bëhet një nga armiqtë tuaj më të rrezikshëm që ju “shtyp” në mënyrë të fshehtë për të paktën tetë ore në ditë.

Kalimi i ditës ulur para ekranit të kompjuterit dhe kthimi në shtëpi për të ndenjur sërish në divan është një nga ato skenarë që dihet si përfundojnë: Dhimbje në të gjithë trupin dhe faturë financiare shumë e lartë.

Alarm? Jo. Mjafton t’i hidhni një sy të dhënave të OBSH-së, sipas së cilës pasiviteti fizik ka një kosto miliona euro në kujdesin e drejtpërdrejtë shëndetësor.

Pasiviteti është “pasaportë” për sëmundjet jo të transmetueshme si sëmundjet e zemrës, goditjet në tru, diabeti, kanceri i gjirit ose zorrës së trashë.

Vazhdoni të mendoni që po e ekzagjerojmë? Le të kalojmë në fazën tjetër të shpjegimit

Çfarë ndodh me trupin tonë gjatë qëndrimit ulur?

“E para gjë që vëmë re është reduktimi i VO2 max, që është sasia maksimale e oksigjenit që ne jemi në gjendje të marrim dhe përdorim në një minutë. Gjatë qëndrimin ulur VO2 max pakësohet, por për të mos e lejuar këtë hyn në punë zemra, e cila rrit ritmin”, shpjegon Vullnet Manushi, specialist i Përgatitjes Fizike dhe Fitnessit.

“Pra, në një farë mënyre ne detyrojmë zemrën që të punojë më shumë për të ruajtur pompimin e të njëjtës sasie gjaku që arrin në muskul. Rezultati: Rrahjet e zemrës në gjendje pushimi rriten duke rritur edhe gjasat që të vuajmë nga një sëmundjeje kardiake”, vijon ai.

Përsa i përket aspektit muskulor, qëndrimi ulur në karrige për një periudhë të gjatë është shkatërrues.

“Mos kryerja e aktivitetit fizik, jeta sedentare ndikojnë në atë që njihet si humbje e masës muskulore ose atrofizim i muskujve me kalimin e kohës.

Vullnet Manushi, specialist i Përgatitjes Fizike dhe Fitnessit
Reduktimi i masës fillon pas të 30-ave, por merr vrull në moshën 50-vjeçare dhe përshpejtohet edhe më shumë në moshën 70-vjeçare”.

Duke humbur fuqinë, funksionet metabolike të muskujve bien, duke i hapur rrugën qelizave yndyrore. Bëhet akoma më keq nëse përveç kësaj, ne nuk lëvizim. E thënë më troç: Fillojmë të shtojmë peshë dhe bëhemi tokë pjellore për shfaqjen e kolesterolit, diabetit etj.

Nga ana tjetër rritja e peshës, mungesa e stërvitjes bëjnë që skeleti “të shtypet”.

Masa kockore dobësohet dhe rriten shanset për osteoporozë.

Një tjetër problem serioz është enjtja e disqeve të rruazave të kurrizit, gjë që çon në dhimbjet e mesit”, thotë Manushi.

Kështu lista e dëmtimeve nga koka deri tek këmbët si pasojë e qëndrimit të keq në kompjuter është aq e gjatë sa edhe dëshpëruese.

Zgjidhja për këtë katastrofë të vërtetë anatomike: Çohuni, lëvizni!

Sipas Manushit do të mjaftonte 150 minuta në javë. Të ngriheni nga karrigia çdo gjysmë ore dhe të bëni disa ushtrime të thjeshta për ç’tensionimin e muskujve gjatë qëndrimit.

Ushtrimet për qafën dhe krahët

Çliro tensionin e shpatullave me tërheqje të qafës dhe krahëve

Shtriji krahët në pozicione të ndryshme dhe mbaji në atë pozicion për 10-15 sekonda.

Rrotulloni qafën nga e majta në të djathë duke mbajtur shpatullat drejt, përsëriteni nga e djathta në të majtë.

Ushtrimet e duarve

Tërhiqni kyçet e duarve për një minutë.

Hapni dhe mbyllni duart grusht duke mbajtur grushtin të mbyllur dhe të shtrënguar për 30 sekonda.

Kapni majat e gishtave me gishtin e madh dhe përsëri këtë veprim minimalisht 10 herë.

Ushtrime të këmbëve

Ngjisni shkallët sa herë që mundeni, shmangni ashensorin.

Qëndroni në majat e gishtave për 30 sekonda, përsëriteni disa herë.

Kontraktoni të pasmet për 5-10 minuta dhe përsëriteni këtë veprim 10 herë.

Ngrini këmbët ndërkohë që qëndroni ulur të paktën 5 sekonda.

Streching

Nga qëndrimi në këmbë, palosuni përpara për të kapur majat e gishtave të këmbës për 15-30 sekonda.

Ulur në karrige, drejtoni supet dhe ngrini gjoksin, mbështesni shputat e duarve mbrapa mesit dhe shtyni përpara duke hapur bërrylat.

Shtrini njërin krah horizontal anash në drejtimin e supit edhe me dorën tjetër tërheqim kokën anash, për relaksimin e muskujve të qafës.

Të dy duart i vendosim mbi majën e kokës dhe ushtroni një tërheqje të lehtë derisa të prekni me mjekër kraharorin. Pas 15 sekondash e ngremë lart kokën dhe pa i hequr duart hapni bërrylat me shikimin lart për relaksimin e qafës dhe shpatullës.