Motoristi kosovar (25) humb jetën duke dashur të shpëtojë këmbësoren

Dëshmitarët i kanë thënë policisë se kosovari kishte humbur kontrollin mbi motor tij kur kishte dashur t`i shmangej një këmbësoreje që i kishte dalë në rrugë

Në një aksident të rëndë që ka ndodhur në mëngjesin e të enjtes në Berlin ka humbur jetën një motorist 25 vjeçar me prejardhje nga Kosova. Sipas policisë motoçikleta e tij është përplasur në stacionin e tramvajit dhe pastaj ka rrëshqitur rreth 80 metra nga vendi i përplasjes.

I riu, i cili ishte i veshur dhe i pajisur sipas rregullave të motoçiklizmit, ka ndërruar jetë në vend të ngjarjes ndërsa. Kalimtarët kanë njoftuar policinë dhe zjarrfikësit dhe po ashtu kanë bërë përpjekje për ta shpëtuar viktimën (sipas medieve gjermane, me emrin Dehmat S.).

Të gjitha përpjekjet e mjekut të emergjencës dhe ekipit të shpëtimtarëve për ta shpëtuar kosovarin, që kanë zgjatur rreth njëzet minuta, kanë përfunduar pa sukses. Dëshmitarët i kanë thënë policisë se kosovari kishte humbur kontrollin mbi motorin e tij kur kishte dashur t`i shmangej një këmbësoreje që i kishte dalë në rrugë. Bëhet e ditur se këmbësorja në fjalë ka ikur nga vendi i ngjarjes.

Kufoma e të riut është transportuar rreth orës 5 të mëngjesit. Motoçikleta është konfiskuar nga policia. Vazhdin të mbetet e paqarte nëse kosovari ishte nën ndikimin e alkoolit ose jo.