AMSS paralajmëron shoferët: MOS i ndërroni ende gomat dimërore!
Auto-Moto Shoqata e Serbisë (AMSS) ka bërë një apel të rëndësishëm për të gjithë shoferët: mos nxitoni të ndërroni gomat dimërore, edhe pse po afrohet fundi i detyrimit ligjor për përdorimin e tyre.
Sipas AMSS, kushtet e motit në këtë periudhë janë ende të paqëndrueshme, me mëngjese dhe net të ftohta, të cilat mund të ndikojnë drejtpërdrejt në sigurinë në rrugë.
Ekspertët paralajmërojnë se reshjet pranverore, shiu i shpeshtë dhe rrugët e lagështa e bëjnë vozitjen më të vështirë.
Në shumë zona mund të ketë edhe dukshmëri të dobët, gjë që rrit rrezikun për aksidente.
Veçanërisht kujdes duhet treguar në zonat malore dhe në lartësi, ku sipas meteorologëve ekziston mundësia edhe për reshje të dobëta bore, edhe pse është pranverë.
Edhe pse shumë shoferë mendojnë se me ardhjen e pranverës është koha për goma verore, AMSS thekson se nuk është momenti i duhur për nxitim.
Gomat dimërore ofrojnë kapje më të mirë në temperatura të ulëta dhe në rrugë të lagështa apo të rrëshqitshme, duke e bërë vozitjen më të sigurt në këto kushte.
