Detaje nga rrezimi i aeroplanit ne Zvicer ku vdiqen 20 persona

Policia zvicerane ka njoftuar se 20 personat në bordin e aeroplanit kanë humbur jetën pas përplasjes në male në juglindje të Zvicrës.
Zyrtarët thanë se 11 burra dhe nëntë gra, shumica prej tyre nga Zvicra janë vrarë.
Në mesin e pasagjerëve ishte edhe një çift austriak.
Sipas autoriteteve hetimet janë duke u zhvilluar. Thuhet se në bord kishte shpërthyer një zjarr që mund të ketë shkaktuar edhe përplasjen.
Aeroplani i vjetër që u përplas të dielën i ndërtuar më 1939, kishte kryer mbi 10.000 orë fluturime dhe rregullisht është kontrolluar për shkak të vitit të prodhimit.
Inspektimi i fundit kishte ndodhur në fund të korrikut derisa nuk ka histori të problemeve teknike të mjetit fluturues.
Aeroplani drejtohej bazuar në shikim dhe harta ndryshe prej instrumenteve moderne por që të tre anëtarët e bordit kishin më shumë se 30 vjet përvojë.