Festë në Prishtinë dhe Tiranë pas fitores së Shqiprisë ndaj Serbisë
Pas fitores historike të Kombëtares Shqiptare ndaj Serbisë në Leskovc me rezultatin 1-0, qytetet shqiptare u pushtuan nga një atmosferë e jashtëzakonshme festimi.
Në Prishtinë, qindra tifozë u mblodhën në sheshin “Zahir Pajaziti” dhe “Nënë Tereza”, duke valëvitur flamujt kuqezi dhe duke brohoritur për golin vendimtar të Rei Manajt, që i dha Shqipërisë një fitore të madhe në tokën serbe. Zhurma e borive, fishekzjarrët dhe këngët patriotike e shndërruan kryeqytetin e Kosovës në një festë të vërtetë kombëtare.
Edhe në Tiranë, atmosfera ishte elektrizuese. Qindra tifozë dolën në rrugë, veçanërisht në zonën e ish-Bllokut dhe sheshin “Skënderbej”, për të festuar suksesin e kuqezinjve. Automjetet me flamuj shqiptarë, thirrjet “Shqipëri, o nëna jonë!” dhe fishekzjarrët ndriçuan qiellin e kryeqytetit deri në orët e vona të natës.
Kjo fitore ndaj Serbisë, e arritur me golin e Manajt në fund të pjesës së parë, u përjetua si më shumë se një triumf sportiv — një moment krenarie kombëtare që bashkoi shqiptarët nga Tirana në Prishtinë, nga Presheva në Shkodër e Tetovë.
Një natë ku flamuri kuqezi valëviti më krenar se kurrë!
