Zëvendëskryeministri Osmani takon ambasadoren e Serbisë, bisedohet për pikën kufitare Llojan-Miratoc
Hapja e kufirit Miratoc-Llojan, zv. ministri Osmani takon ambasadoren serbe në Shkup
Zëvendës ministri për euro-integrime i Republikës së Maqedonisë z. Bujar Osmani është takuar me ambasadoren serbe në Shkup, z. Dushanka Divjak Tomiq.
Temë kryesore e takimit ishte hapja e vendkalimit kufitar Miratoc-Llojan.
“Pika e kalimit kufitar lokal Llojan-Miratoc ka rëndësi të veçantë për popullatën nga komunat kufitare, ndërkaq finalizimi dhe vënia në funksion, me saktësi do të ilustrojë marrëdhëniet e mira mes Maqedonisë dhe Serbisë” – ka shkruajtur ministri Osmani në rrjetet sociale.
Disa javë më parë kryetari i komunës së Preshevës Shqiprim Arifi paralajmëroi që aktivitetet e zhvilluara me Ambasadat e akredituara në Beograd si dhe takimet me kryeparlamentarin e Maqedonisë z. Talat Xhaferi dhe homologun e tij të komunës së Likovës z. Erkan Arifi, tashmë kanë dhënë rezultatet e para.
Ambasadori norvegjez në Beograd ka qenë më i zëshmi dhe në mënyrë intensive i ka zhvilluar aktivitetet mbi ndjekjen dhe përshpejtimin e procedurave ndërshtetërore mes Serbisë dhe Maqedonisë.
Ai poashtu i ka siguruar dhe fondeve për rregullimin e vendkalimeve kufitare nga të dyja anët me infrastrukturën dhe pajisjet e nevojshme.
Data e saktë për hapjen e vendkalimit kufitar Miratoc-Llojan nuk dihet, por aktivitetet ndërshtetërore mes ministrive përkatëse tashmë janë zhvilluar në një stad të lartë dhe se hapja e kufirit tashmë nuk është temë tabu, por çështje kohe.
