Ky vend i tha JO FESTIMIT TË VITIT TË RI!
Italia ka shtrënguar masat për të frenuar rritjen e personave të infektuar me Covid 19, duke përfshirë ndalimin e të gjitha festimeve të Vitit të Ri, ndërsa numri i infeksioneve ditore arrin shifra rekord, tha qeveria italiane.
Ministri i Shëndetësisë Roberto Speranza tha se mbajtja e maskave do të jetë përsëri e detyrueshme jashtë dhe urdhëroi qytetarët që të përdorin maskat FFP2 në transportin publik dhe në vende publike, si teatrot, kinematë dhe ngjarjet sportive, pasi ato ofrojnë mbrojtje më të madhe.
Koncertet dhe aktivitetet në natyrë do të ndalohen deri më 31 janar, ndërsa diskotekat dhe klubet e natës do të mbyllen deri në atë datë, për të parandaluar grumbullimet masive gjatë periudhës së festave.
Masat e reja u njoftuan të enjten, ditën kur Italia regjistroi 44,595 raste të reja me koronavirus, që është një rritje prej më shumë se 70 për qind në vetëm një javë, pasi varianti më ngjitës i omicron u përhap në të gjithë vendin.
Gjithnjë e më shumë vdekje
Ka pasur edhe më shumë vdekje, 168 të enjten, numri më i lartë që nga maji, por nën nivelin e pikut të mëparshëm të infeksionit, kryesisht për shkak të numrit të madh të personave të vaksinuar.
Speranza tha se gati 89 për qind e italianëve janë vaksinuar, por qeveria kërkon të përshpejtojë vaksinimin me dozën e tretë, e cila, siç u shpreh ai, është mbrojtja më efektive kundër variantit omikron që rrënon Europën dhe Shtetet e Bashkuara.
Në këtë kuptim, qeveria do të zvogëlojë kohën e pritjes për dozën e tretë pas marrjes së dozës së dytë nga pesë muaj në katër.
Ministrat ranë dakord gjithashtu për të ulur vlefshmërinë e certifikatave shëndetësore, të cilat nevojiten për të hyrë në shumë vende dhe shërbime, duke qenë se efektiviteti i vaksinave dobësohet me kalimin e kohës.
Kështu, nga 1 shkurti, certifikatat e vaksinimit do të jenë të vlefshme për gjashtë muaj, në vend të nëntë.
Italia ishte vendi i parë perëndimor që u godit nga një pandemi vitin e kaluar dhe deri më tani ka pasur 136,245 vdekje, që është shkalla e dytë më e lartë e vdekjeve në Evropë pas Britanisë.
