Rrëmbimi i 3 policëve të Kosovës, avokati serb: S’ka baza ligjore për mbajtjen e tyre. Nëse s’lirohen, Serbia shkel marrëveshjen e Brukselit

Avokati serb Çedor Stojkoviç, ka reaguar për rrëmbimin e tre policëve të Kosovës, nga forcat serbe ‘Kobra’.

Ai ka thënë se duhet të lirohen pasi sipas tij nuk ka asnjë bazë ligjore për ndalimin e tyre.

Nëpërmjet një reagimi në ‘Twitter’, Stojkoviç është shprehur se nëse ata nuk lirohen, atëherë Serbia shkel marrëveshjen e Brukselit.

“Policët e Kosovës duhet të lirohen. Nuk ka asnjë bazë reale ligjore për ndalimin e tyre. Nëse nuk lirohen, kjo do të thotë se Serbia po shkel Marrëveshjen e Brukselit, por edhe se nuk ka ndërmend paqen me Kosovën”, ka thënë ai.