Pas zgjedhjeve parlamentare, Serbia zgjedh presidentin deri më 27 dhjetor: çfarë do të bëjnë shqiptarët e Luginës?
Vetëm tre ditë pas zgjedhjeve parlamentare, Serbia po përgatitet për një proces të ri zgjedhor. Këtë herë do të zgjidhet presidenti i vendit.
Më 27 shtator, Aleksandër Vuçiq dha dorëheqje nga posti i presidentit, me synimin për t’u rikthyer si kryeministër pas zgjedhjeve parlamentare. Që atëherë, detyrën e presidentit e kryen përkohësisht kryetarja e Kuvendit, Ana Bërnabiq.
Sipas Kushtetutës së Serbisë, kur presidenti jep dorëheqje, zgjedhjet e reja presidenciale duhet të mbahen brenda tre muajve. Kjo do të thotë se qytetarët e Serbisë duhet të votojnë për president më së voni deri më 27 dhjetor, raporton BBC në serbisht. Data e saktë e zgjedhjeve ende nuk është shpallur.
Zgjedhjet presidenciale vijnë pas një ndryshimi të madh: Lista Studentore fitoi shumicën absolute në Kuvend, ndërsa Vuçiqi e pranoi humbjen pas 14 vjetësh në pushtet. Tani pritet të shihet se cilët kandidatë do të dalin për president, si nga radhët e fituesve të rinj, ashtu edhe nga SNS-i.
Për shqiptarët e Luginës, pyetja kryesore është nëse do të marrin pjesë në këto zgjedhje dhe si.
Në zgjedhjet presidenciale të vitit 2022, partitë shqiptare nuk mbështetën asnjë kandidat. Shaip Kamberi deklaroi atëherë se asnjë nga kandidatët për president nuk kishte treguar interes për çështjet e pakicave, prandaj shqiptarët refuzuan t’i mbështesin.
Këtë herë rrethanat janë ndryshe. Koalicioni Shqiptar doli i bashkuar dhe fitoi dy mandate, ndërsa Visar Mehmeti tha pas zgjedhjeve se Koalicioni është i hapur për bisedime me Listën Studentore për çështjet e shqiptarëve.
Nëse shqiptarët do t’i bojkotojnë sërish zgjedhjet presidenciale, apo do të përdorin votat e tyre si mjet për të kërkuar zotime konkrete nga kandidatët, do të varet nga vendimi i përbashkët i partive të Koalicionit Shqiptar. Deri më tani, ato nuk kanë dhënë asnjë qëndrim publik për këtë çështje.
Burimi: BBC në serbisht, Presheva.AL
