CeSID: Koalicioni Shqiptar fiton dy mandate, Lista Studentore shumicën në Kuvendin e Serbisë

Sipas projeksionit të Qendrës për Zgjedhje të Lira dhe Demokraci (CeSID) dhe Ipsos-it, me 56 për qind të mostrës së përpunuar, “Koalicioni Shqiptar” ka fituar dy mandate në Kuvendin e Serbisë.
Lista e përbashkët e shqiptarëve të Luginës ka marrë **0,8 për qind** të votave në nivel të Serbisë. Si listë e pakicës kombëtare, ajo nuk ka nevojë të kalojë pragun prej 3 për qind dhe merr pjesë drejtpërdrejt në ndarjen e mandateve.
Sipas renditjes në listë, dy mandatet u takojnë bartësit Shaip Kamberi (PVD) dhe Visar Mehmetit (APN).
Fituese e zgjedhjeve është Lista Studentore, me **52 për qind** të votave dhe 139 mandate nga 250, që i jep shumicën absolute në Kuvend. Lista “Serbia e Bashkuar” e Aleksandër Vuçiqit ka marrë 39,3 për qind dhe 104 mandate.
Nga listat e pakicave, në Kuvend hyjnë edhe hungarezët e Vojvodinës me tre mandate, si dhe SDA e Sanxhakut dhe SDP e Rasim Ljajiqit me nga një mandat.
Faktori i Stabilitetit i Ivica Daçiqit, me 2,3 për qind, mbetet jashtë Kuvendit.
Lista Studentore – 52,0% – 139 mandate
Serbia e Bashkuar – Vuçiq – 39,3% – 104 mandate
Hungarezët e Vojvodinës – 0,9% – 3 mandate
Koalicioni Shqiptar – 0,8% – 2 mandate
SDA e Sanxhakut – 0,4% – 1 mandate
SDP – Ljajiq – 0,5% – 1 mandate
Vuçiq e ka pranuar humbjen më herët gjatë mbrëmjes, duke thënë se sipas mostrës së tyre është e qartë që i kanë humbur zgjedhjet.
Ky është rezultati i parë i “Koalicionit Shqiptar”, listës që bashkoi tetë parti shqiptare nga Presheva, Bujanoci dhe Medvegja. Në zgjedhjet e kaluara, kur partitë shqiptare garuan të ndara, Lugina kishte vetëm një deputet në Kuvendin e Serbisë.
Dalja e lartë në Luginë, ku vetëm në Preshevë deri në ora 19:00 votuan mbi 37 për qind e votuesve, si dhe fluksi i madh i votuesve që erdhën nga Kosova në orët e pasdites, ndikuan në këtë rezultat.
Rezultatet zyrtare dhe përfundimtare do t’i shpallë Komisioni Republikan i Zgjedhjeve.
Burimi: CeSID / Ipsos
