Thaçi përsërit: Jam për bashkimin e Luginës me Kosovën

Presidenti i vendit, Hashim Thaçi sërish ka folur rreth çështjes së korrigjimit të kufijve.

Thaçi në hapjen e “Javës me bizneset e diasporës shqiptare”, aktivitet ky i cili organizohet nga Ministria e Diasporës dhe Investimeve Strategjike në bashkëpunim me Odën Ekonomike Gjermano-Kosovare tha se vendi është në një rrethanë të mundësive të mëdha që asnjë herë nuk e ka pasur.

Sipas tij, Kosova sot ka 116 njohje. Ai shpreson se Kosova shumë shpejt pritet të bëhet pjesë e INTERPOl.

“Bota ka ndryshuar, diku për të mirë diku për të keq. Prandaj, edhe konflikti i ngrirë në mes Kosovës dhe Serbisë duhet të tejkalohet në mënyrë paqësore. Përkushtimi im sot është që në kuadër të dialogut me Serbinë të mos bëhemi pengesë për integrime në BE, NATO etj. Kosova nuk guxon të bojkotoj dialogun… Pas takimit me krerët e Luginës së Preshevës për vullnetin e tyre që të bashkohen në Kosovë. Prandaj, nevojitet ky korrigjim, mirëpo duke i pasur Ujmanin dhe Trepçën. Unë nuk jam për të dhënë, por për të marr Luginën e Preshevës”, theksoi Thaçi, duke shtuar se nuk do të lejoj ‘Republika Srpska’ dhe ndarje të Kosovës e as këmbim të territorit, raporton KP.