Familjet me më pak pronarë të shtëpive: Zvicra, e para në Evropë

Shqipëria renditet ndër vendet me përqindjen më të lartë të familjeve që janë pronare të shtëpive ku jetojnë në Evropë. Ndërsa në rajon ajo qëndron e para. Në total 90.2% e familjeve janë pronare të shtëpisë ku jetojnë, ndërsa 5% jetojnë me qira, sipas INSTAT.

Sipas tëdhënave që ka publikuar Eurostat së fundmi, vendi me përqindjen më të lartë të familjeve që e zotërojnë pronën ku jetojnë është Rumania, me 96.8% të familjeve pronare, e ndjekur nga Kroacia me 90.5% dhe Shqipëria me 90.2%.

Krahasuar me vendet e rajonit, si Serbia dhe Maqedonia e Veriut, përqindja e familjeve shqiptare që kanë shtëpinë e tyre në pronësi është më e lartë. Në Maqedoninë e Veriut vetëm 88.7% zotërojnë shtëpinë, ndërsa në Serbi 82%, sipas Eurostat. Turqia, një tjetër vend kandidat për t’u anëtarësuar në BE, renditet ndër vendet me përqindjen më të ulët të familjeve që zotërojnë shtëpinë ku jetojnë me 59.1%, transmeton ‘Monitor’.

Duke analizuar të dhënat e publikuar nga Eurostat kuptojmë se përqindjen më të lartë të pronarëve të shtëpive e kanë vendet lindore dhe ish-komuniste, përcjell albinfo.ch.

Në vendet ish-komuniste përqindja e familjeve që zotërojnë shtëpinë varion nga 78.5% në vende si Çekia në gati 83% në Bullgari, apo 89.7% në Lituani.

Vendet me përqindjen më të ulët

Zvicra ka përqindjen më të ulët të familjeve që janë edhe pronarë të shtëpive ku jetojnë. Sipas të dhënave të Eurostat më pak se gjysma (41.3%) e familjeve janë pronarë të shtëpive të tyre. Pas saj renditet Gjermania me 51.4%, Austria me 55%, Danimarka me 62.2%, Franca me 64.4%, Mbretëria e Bashkuar me 65% dhe Suedia me 65.2%.

Të gjitha vendet e sipërpërmendura kanë një përqindje më të ulët se mesatarja e Bashkimit Evropian prej 69.3%.