Millovan Drecun: Fitorja e Kurtit mbi 50% nuk është e mirë për Serbinë
Millovan Drecun, kryetar i Komisionit parlamentar për mbrojtje dhe punë të brendshme në Serbi, ka shprehur shqetësimin e tij lidhur me zgjedhjet e 9 shkurtit në Kosovë. Në një intervistë për Televizionin Publik Serb (RTS1), Drecun pranoi se shpresonin për një humbje të Albin Kurtit, por sipas tij, sondazhet dhe informacionet nga terreni tregojnë se kryeministri aktual i Kosovës pritet t’i fitojë zgjedhjet me mbi 50% të votave.
“Shpresuam se Albin Kurti do t’i humbiste zgjedhjet, por sipas informacioneve që po na vijnë nga terreni dhe anketat që po zhvillohen atje, Kurti edhe këto zgjedhje do t’i fitojë me mbi 50%. Kjo aspak nuk është e mirë për Serbinë,” deklaroi ai.
Deklarata e Drecunit tregon qartë shqetësimin e Beogradit për dominimin politik të Kurtit në Kosovë, duke pasur parasysh qasjen e tij të fortë ndaj Serbisë dhe politikën e tij për sovranitetin e plotë të vendit. Në Serbi, këto zhvillime po shihen si një sfidë e madhe për strategjinë e ardhshme ndaj Kosovës.
Ndërkohë, mbetet për t’u parë nëse rezultatet e zgjedhjeve të 9 shkurtit do të konfirmojnë parashikimet e sondazheve dhe si do të reflektojë Beogradi ndaj këtij skenari.
