Ardita Sinani uron Pashkët: “Populli ynë është shembull i harmonisë ndërfetare”

Në një postim të publikuar sot në rrjetin social Facebook, Ardita Sinani, kryetare e Komunës së Preshevës, ka uruar të gjithë besimtarët e krishterë për festën e Pashkëve, duke theksuar vlerat e bashkëjetesës dhe harmonisë ndërfetare në këtë komunë multietnike.

“Me dëshirën që kjo festë e shenjtë të sjellë paqe, dashuri, mirëkuptim dhe shpresë në çdo familje”, shkruan Sinani, duke përfshirë në urimin e saj si besimtarët katolikë ashtu edhe ata ortodoksë.

Ajo theksoi se Pashkët janë një moment reflektimi shpirtëror dhe një mundësi për të kujtuar rëndësinë e besimit, forcën e solidaritetit dhe nevojën për bashkëjetesë mes komuniteteve.

“Si shqiptare dhe si myslimane, e ndjej për detyrë të theksoj me krenari se populli ynë është shembull i tolerancës dhe harmonisë ndërfetare, një vlerë që na bashkon dhe na forcon si shoqëri”, përfundon ajo në mesazhin e saj.

“Gëzuar Pashkët!” ishte urimi i përbashkët që mbylli mesazhin e saj festiv.