Edhe studentët nga Lugina e Preshevës përfitojnë nga ndihma prej 100 euro
Qeveria e Republikës së Kosovës ka hapur mundësinë që të gjithë studentët e Luginës së Preshevës që studiojnë në institucionet e arsimit të lartë në Kosovë të përfitojnë nga mbështetja financiare përmes platformës shtetërore eKosova.
Sipas vendimit të Ministrisë së Financave, Punës dhe Transfereve, të gjithë studentët aktivë të nivelit Bachelor, Master dhe Doktoratë kanë të drejtë të aplikojnë për shtesën e njëhershme prej 100 eurosh.
Në këtë kategori përfshihen edhe studentët nga Presheva, Bujanoci dhe Medvegja që ndjekin studimet e tyre në universitetet publike dhe private në Kosovë.
Përveç kësaj, përmes së njëjtës platformë, studentët nga familje me të ardhura vjetore nën 12 mijë euro mund të aplikojnë edhe për Bursën e Mobilitetit të Studentëve, një program që synon të mbështesë të rinjtë me kushte ekonomike më të vështira.
Afati i aplikimit është i hapur deri në fund të tetorit, dhe aplikimi bëhet në mënyrë elektronike përmes platformës eKosova.
Ky vendim shihet si një hap i rëndësishëm drejt përfshirjes së studentëve nga Lugina e Preshevës në politikat arsimore të Kosovës dhe si një formë konkrete e mbështetjes për rininë shqiptare jashtë kufijve administrativë të Kosovës.
Mbështetja financiare synon të lehtësojë barrën ekonomike të studentëve dhe të inkurajojë pjesëmarrjen e tyre aktive në jetën akademike dhe shoqërore.
